سلطت الإعلامية لما جبريل الضوء على موجة الحر غير المسبوقة التي تضرب عددًا من الدول الأوروبية، موضحة أن ارتفاع درجات الحرارة لا يمثل مجرد حالة طقس استثنائية، بل تحول إلى أزمة إنسانية تسببت في وفاة أكثر من 1300 شخص خلال أيام، وفقًا لمنظمة الصحة العالمية.
وخلال فقرتها عن أبرز التريندات ببرنامج «الحكاية» المذاع على قناة MBC مصر، مع الإعلامي عمرو أديب: الناس ممكن تموت من البرد؟ بس هل الحر ممكن يموت حد؟.. خلوني أقولكم أن أوروبا مولعة نار.. وده مش حريق لا سمح الله .. منظمة الصحة العالمية قالت أن فيه أكتر من 1300 شخص من يوم 21 يونيو لحد النهاردة ماتوا بسبب موجة حر تاريخية.. دول زي فرنسا بولندا وألمانيا والتشيك .. سجلت درجات حرارة عدت الـ 41 درجة لأول مرة من 100 سنة”.
وتابعت لما جبريل: “طبعا إحنا المصريين كعادتنا أخدنا الموضوع تريقة.. وإيه الفرفرة دي؟ إحنا عندنا الحر بيوصل 45 وبننزل نشتغل عادي.. بس هو الحقيقة الموضوع عندهم مش عادي خالص.. وتعال هفهمك ليه الـ 40 درجة هناك أصعب بكتير من عندنا في مصر؟”.
وأضافت لما جبريل: “ البيوت في أوروبا معزولة عشان تحبس الحرارة جوه بسبب برد الشتا.. فلما الصيف ييجي البيت بيسخن جداً وكأنه فرن.. كمان الشمس مبتغربش غير بعد 10 بالليل.. والنهار بيوصل لـ 19 ساعة حرفياً.. فالجو مابيلحقش يبرد.. ده غير أن البيوت في أوروبا مفيهاش تكييفات خالص.. كل السيستم هناك مصمم للدفايات بس.. فالناس بتقابل الحر من غير أي تبريد”.
يذكر أن الإعلامية لما جبريل تقدم فقرة متخصصة في التريندات ببرنامج “الحكاية” مع الإعلامي عمرو أديب عبر قناة “إم بي سي مصر”، أسبوعيًا يومي الأحد والإثنين، وتتناول من خلالها ما يحدث على السوشيال ميديا، طوال الأسبوع وكيف يتفاعل معها الجمهور.
