كود- سبتة//
قالت جريدة “إل باييس” الإسبانية بلي أزمة الهجرة الأخيرة فسبتة ما بقاتش غير أزمة حدود، ولكن ولات كتخلق احتقان وسط عدد من أحياء المدينة، بعدما بدا بعض السكان كينظمو راسهم فـ”عصابات الأحياء” باش يمنعو الحراگة يقربو من الديور.
اقرأ أيضا: زيارة ميدانية لمعاينة الأضرار بغابة غار الملح تمهيدا لخطة إعادتها
$bos(“Brid_15182230”, {“id”:”27333″,”width”:”100%”,”height”:”300″});
وبدات الجريدة تقريرها بقصة ساندرا لوبيز، المسؤولة المحلية فالحزب الاشتراكي الإسباني، اللي تلقات بحارگ سميتو عادل كان باغي يوصل لحي بينزو، ولكنو رفض يدوز من حي بوستيجو بعدما أكد ليها أنه تعرض فيه لاعتداء.
الشاب وراها آثار جروح فجسمو، ورفض يمشي يبلغ البوليس حيث خاف من الاعتقال والترحيل للفنيدق. وبعدها، شافت لوبيز عددا من السكان كيراقبو دخلات دشوارع، هازين لعصي دالبيزلول والهراوات.
وحسب التقرير، هاد الظاهرة ما بقاتش مقتاصرة على حي واحد، ولكن حتى فأحياء بحال لوس روساليس وبينيتيز، فين دارو السكان براجات ديال الحراسة ليل ونهار باش يمنعو البرانيين يدخلو، وخا أن السلطات الإسبانية كتقول بلي أغلب الحراگة رجعو ولكن لالوفات منهم بقاو مخبيين كيقلبو على الما والماكلة والسكنة.
وضافت “إل باييس” أنها قدرات دخل لمجموعات واتساب كينسقو بين هاد الكليكلات، لي كيتبادلو الصور والمواقع، وكيحددو بلايص المهاجرين اللي كيتخباو فالجبال وحدا البحر، وكتبين الرسائل، حسب الجريدة، دعوات باش يخرجو بالليل ويتبعو الحراگة، مع تعليمات بعدم التصوير، وتغطية الوشوم وإخفاء الهوية باش ما يتعرفوش.
اقرأ أيضا: اندلاع حرائق…اخر المستجدات
كما قالت الجريدة أن الجيش كيدير دوريات ولكن ما عندوش صلاحية للتدخل، الشي لي استغلوه منظمو هاد المجموعات باش يشجعو المشاركين على هاد الخدمة.
وكتقول الجريدة إن بعض المشاركين بداو كيرسلو فالمجموعات أن أحياء فلانية “ولات نقية” من الحراگة.
وعلى المستوى السياسي، شارت “إل باييس” بلي حزب فوكس كان الحزب الوحيد اللي دافع بشكل علني على حق السكان فـ”الدفاع على النفس”، بعدما قال أحد المسؤولين انه من حق المواطنين الدفاع على عائلاتهم وممتلكاتهم “بالعصا أو بأي وسيلة”.
وفالمقابل، حاولت مجموعات وشخصيات من اليمين المتطرف تستغل الأزمة وتلتحق بهاد المجموعات، قبل ما يجريو عليهم مغاربة سبتة.
اقرأ أيضا: استقرار عوائد سندات الخزانة الأمريكية قبيل صدور بيانات الوظائف والبطالة
