عمر المزين – كود///
تحولات سهرة ديال سبوع تنظمات البارح الثلاثاء فواحد القاعة للأفراح قريبة من مطار فاس سايس، لمهاجر مغربي مقيم فبلجيكا، لموضوع ديال النقاش فالسوشيال ميديا، من بعد ما عرفات ارتباك كبير وسط الفقرات الفنية اللي كانت غادي تجمع الفنان الشعبي محمد العسري، ودنيا باطمة، والمنشد مروان حاجي.
$bos(“Brid_15182230”, {“id”:”27333″,”width”:”100%”,”height”:”300″});
وحسب المعطيات اللي توصلات بها “كود”، فالعسري كان أول فنان طلع للمنصة وقدّم الوصلة الشعبية ديالو، ومنين سالى طلب من أفراد الفرقة الموسيقية اللي كانت مرافقاه يغادرو القاعة، وهو الشي اللي خلا دنيا باطمة تلقى راسها بلا فرقة موسيقية باش تكمل الوصلة ديالها.
وما وقفش الأمر عند دنيا باطمة، حيث حتى المنشد مروان حاجي لقا راسو فالنفس الموقف، بعدما انساحبات الفرقة الموسيقية، وهو الشي اللي خلق استياء وسط عدد من المدعوين، وعبرات دنيا باطمة ومروان حاجي على الغضب ديالهم من هاد التصرف، اللي اعتابر عدد من الحاضرين أنه ما كانش موفق.
وفهاد الظرف، تدخلات فرقة عيساوية محلية من مدينة فاس وقدمت المساعدة للفنانين باش يكملو السهرة، وسط تفاعل الحاضرين، فيما قالت دنيا باطمة على حسابتها بالأنستغرام أن “حنا كنوضوها غير بتعريجة وبندير سييير على باباه” كانو كافيين باش يدوز واحد من أحسن السوابع.
ومن بعد الحادث، خرجات دنيا باطمة بتدوينة على حسابها الرسمي فـ”إنستغرام”، عبرات فيها على الاستياء ديالها من اللي وقع، وقالت إنها كانت كتعتبر الفنانين المغاربة فريق واحد، قبل ما تضيف أنها تفاجأت باللي وقع. كما وجهات الشكر للفرقة العيساوية اللي سانداتها باش تكمل السهرة، وأكدات أن الأخلاق والاحترام كيبقاو فوق أي اعتبار.
