گود سبور//
مازال خبر “وعد جياني إنفانتينو رئيس الفيفا المغرب والكاف باستضافة الدار البيضاء لفينال مونديال 2030″، داير حالة فالصبليون، واخا الاتحاد الدولي لكرة القدم خرجو بيان نفاو فيه هاذ الشي، ولكن كايبان أن الإسبان خايفين بزاف يمشي لهم الفينال، وولاو حاسين بقوة الملف المغربي فالمنافسة على استضافة النهائي ضمن التنظيم المشترك للمونديال بين البلدين مع البرتغال، وأن الكفة فهاد التنافس كاتميل للمغرب من تيران الحسن الثاني الكبير فالدار البيضاء اللي غايكون اكبر ملعب فالملعب بطاقة استيعابية كاتوصل لـ115 ألف بلاصة، مقابل ملعبي سنتياگو برنابيو فمدريد والكامب نو د برشلونة اللي داخلة بهم الصبليون المنافسة.
$bos(“Brid_15182230”, {“id”:”27333″,”width”:”100%”,”height”:”300″});
ونقلت جريدة “موندو ديبورتيفو” الإسبانية تصريحات ميلاگروس تولون وزيرة الرياضة فالصبليون فوزارة بيدرو سانشيز، على “راديو كادينا”، وقالت بخصوص فينال مونديال 2030: “حنا كانستاهلوه، وديما كنا ملتزمين باستضافتو فالصبليون”.
وكملت وزيرة الرياضة الإسبانية، وقالت: “أولا حنا أبطال كأس العالم للرجال والعيالات، وثانيا بدات إسبانيا والبرتغال ملف ترشيح كاس العالم 2030، وانضم لهم المغرب من بعد، عاد داكشي اللي عندنا من مزايا وقدراتنا كدولة”.
وامتنعت الوزيرة الإسبانية على دعم شي مدينة معينة بين مدريد وبرشلونة اللي مرشحينهم الصبليون لاستضافة نهائي مونديال 2030، أكدت أن المهم هو يتلعب الفينال فالصبليون: “كحكومة بغينا يتلعب ماتش الفينال فالصبليون، والفيفا اللي غادي يقررو، ولكن بغيناه فبلادنا حيث كانستاهلوه”.
وبخصوص الخبر اللي نشراتو The Times بأن رئيس الفيفا انفانتينو واعد المغرب والكاف بإقامة نهائي كاس العالم 2030 فالدار البيضاء، وهو الخبر اللي نفاتو الفيفا، قالت وزيرة الرياضة الإسبانية: “تفاجأنا بزاف، والمهم هو الفيفا نفت هذا الشي، وحنا خدامين معهم وعندنا اجتماع فسبتمبر، وغادي نكملو الخدمة حيث بغينا وخاص يكون ماتش فينال كاس العالم فالصبليون”.
