كود تطوان///
الزماكرية كيدوزو فصيف خانز فالشمال. المنطقة اللي كتشهد دينامية سياحية كبيرة، بالتزامن مع الزيارة الملكية، كتعاني فيها هاد الأيام أسر من أفراد الجالية المغربية المقيمة بالخارج من وضعية كارثية.
$bos(“Brid_15182230”, {“id”:”27333″,”width”:”100%”,”height”:”300″});
هاد الأسر عندها مشكل مع شركة “أمانديس”. فمنذ أيام، تفركع الواد الحار فالمنتجع السياحي اللي شاريين فيه شققهم، واللي كاين حدا الغولف فكابو نيكرو، وانتشرت روائح كريهة وسط المنتجع، قبل ما يوصل الواد الحار حتى لشقق السكان، مكبدا إياهم خسائر كبيرة ومشاكل صعيبة.
ورغم أن المتضررين دارو اتصالات عديدة بشركة “أمانديس” باش تتدخل، إلا أنهم، حسب تعبيرهم، ما لقاوش أي تجاوب حقيقي، واكتفت الشركة بحلول ترقيعية، وخلاتهم يواجهو المشكل ويعيشو وسط خنز الواد الحار.
وزادت الوضعية تعقدا مع موجة الحرارة اللي كتشهدها المملكة، حيث ولات الروائح الكريهة لا تطاق، وغرق المنتجع فالواد الحار، مع انتشار الحشرات، الشي اللي حول عطلة هاد الأسر إلى معاناة كبيرة بزاف.
المتضررون عامل عمالة المضيق ووالي الجهة بالتدخل العاجل لوضع حد لهاد الوضع، في ظل تنسيق بينهم للتصعيد وخوض وقفات احتجاجية أمام مقر الشركة والعمالة، بعدما، حسب قولهم، “تكرفسو مزيان”، ولقاو راسهم كيتستقبلو فبلادهم بالخنز والواد الحار بدل يقضيو عطلتهم فظروف لائقة.
دابا، واش هادي هي الحالة اللي خاص الواحد يدوز فيها الكونجي ديالو فواحد المركب السياحي كبير فكابو نيكرو، غير حيث شي مسؤولين ما قادرينش يديرو خدمتهم؟ هادشي هادشي ما كيشرفش، وخاص المسؤولين يتحملو مسؤوليتهم.
